VOTE! RIZON for MAYOR

HAGIT SA KAUSABAN.., SIDLAK BAROY!

Kini ang tingog sa katawhan. Tingog sa kabatan-onan. Tingog sa mga hamtong, tigulang, inahan, mga mamumuo, magtutudlo, mag-uuma o niadtong bisan diin nga hut-ong sa katilingban. Usa ka kusog nga tingog nga nagbudyong sa tinguha ug naglarawan sa nagkahiusang katawhan nga kanunayng nangandoy og kalamboan, kalinaw ug panagdait sa ilang dapit. Ug Oo, usa usab kini ka tingog alang niadtong nagpakahilom taliwala sa ilang pag-antos ug pagduhaduha. Usa kini ka panaghugpong sa mga lungsoranon kinsa nagtuo nga ang katakos sa pag-uswag iya sa katawhan, gikan sa katawhan ug alang sa katawhan. Hugot akong nagtuo nga dunay daghang nangita sa dapit nga sama niini. Dapit diin hubaron ang atong mga pulong ug hunahuna ngadto sa usa ka buhat alang sa kaayohan sa kinabag-an. Usa kini ka behikulo sa gawasnong pagpadayag ug pagpakabana. Usa ka talagsaong kahigayonan sa paglihok. Busa, uban ug sunod kamo sa kausa. Dayon kamo. Duyog sa paningkamot alang sa usa ka maayong tinguha. Himoa ang imong kaugalingon nga kabahin sa usa ka makanunayong kausaban. Ipakita ang imong gugma sa imong lungsod. Ako masaligon nga ang atong lungsod karon, nagkinahanglang og lig-ong liderato ug integridad alang sa kalinaw, kalamboan ug panaghiusa. Atong ibalik ang kagamhanan sa katawhan. Atong ibalik ang kalagsik sa Baroy. Atong ibalik ang lig-on nga liderato.

Ang pagbalik sa drugas sa atong lungsod ug ang pagdagsang sa mga nagkalainlaing krimen usa ka timailhan nga nagsinggit ang katawhan og kausaban. Ang pagbalik sa kangitngit sa atong lungsod usa ka resulta sa huyang ug iresponsable nga liderato sa namunuan sa atong lungsod karon. Usa kini ka kamatuoran nga ang naghupot sa munisipyo karon mao ray ilang gihunahuna ang ilang kaugalingon ug dili ang kinabag-an sa katawhan. Nagkinahanglan og kausaban ang atong lungsod .., ug diha kini ninyo magsugod mabuot nga katawhan.