BATAN-ONG KUSOG.., BAG-ONG PAGLAOM!

Ang mga batan-on nitingog na. Nagpakabana na sila. Nanginlabot na sa kalihokan sa nasud ug sa kinabag-an sa katawhan. Hinaot nga karong nakakaplag na sa ilang tingog, dili na sila magpakahilom pag-usab. Hinaot nga karong nagsugod nag panginlabot, dili na sila mangiyugpos ug maghinan-aw lang.

Ang mga hamtong angayng mobukas sa ilang kasingkasing ug hunahuna. Hinaot nga ilang hatagan og higayon ang mga batan-on nga makaumol sa ilang baruganan. Ug makatanyag sa ilang kaugalingong mga sugyot paghaw-as sa nasud gikan sa katimawa nga iyang nahimutangan karon. Ang mga kasaysayan sa paglingkawas sa nagkalainlaing kanasuran, apil na sa atong kaugalingong yutang natawhan, gisugdan di sa mga hamtong kon dili sa kabatan-onan.

Ang mga nagtungkawo sa gahom—ang mga labing gamhanan ug ang mga labing adunahan—mas maayo pang manguros na lang daan. Inihap na lang ang malipayong mga adlaw sa ilang pagpahimulos. Hapit na moabot ang adlaw sa panudya. Hapit na motimbakuwas ang katawhan pagsakmit pagbalik sa ilang makiangayong luna ubos sa adlaw.

Ang tinuorayng kausaban nia na. Wa pa mabantang ang kinatibuk-ang bayhon apan, sama sa baha nga tinong mosunod sa pagbunok sa uwan sa patag ug kabukiran, di na kapugngan. Mahimong gamay pa lang nga tubod ang pasiunang nakita. Apan ang lapad nga kausaban nga mobanlas sa tanang mantsa ug kahiwian sa mga institusyon di na mapiog.